पढ़िए साहित्यकार दीनदयाल बन्दूणी की गढ़वाली कविता
एक – हैंक म , बोलद रै गिवां.
अफी छकी , अफि पकी गिवां.
क्या पायि-क्या ख्वायी, अबतक-
तोलदा- मोलदा , अफतैं रै गिवां..
दुन्या कख बटि , कख बढिगे.
क्वी ऐबरेस्ट , क्वी चांद चढिगे.
हम सगोड़ि म , गबेयूं मूळा सी –
कुछ-कुछ जमिगे , कुछ सड़िगे..
हमरि सोच , हमी तक रैग्या.
हमतैं कोल़णौं, कुड़ाॅबुड खैग्या.
जरा-तरा कुछ, बच्यूं-खुच्यूं छौ –
वे तैं , कितली – कंटर पेग्या..
बात बड़ीं कन , खड़ा – खड़ी.
रासन – पाॅड़ीं , दौड़ा – दौड़ी.
भितरौं , भांडा बजड़ाॅ छन –
हुईं देखा- सेकि , उठा- पोड़ी..
फसगा रैगीं , बड़ी – बड़ीं.
पक्यां चखुला उड़ैं, खड़ा-खड़ीं.
रीति – नीति की , बात न पूछा –
बात पीछा , दिखै जंदी तड़ीं..
सौ – समाज कू , मोल़ लग्यूंच.
भितरा पर्वाण , भैर भग्यूंच.
चुंच्या-खुंच्या , धर्वाण-पर्वाण –
दुया कु चार , हूंण लग्यूंच..
‘दीन’ ! समझ , तैं सोच जगौ.
कंटर – कितली , दूर भगौ.
हूंणी- बांणी , करड़ि – कमांड़ीं-
पाणौं म चलि , नैं हवा बगौ..
कवि का परिचय
नाम .. दीनदयाल बन्दूणी ‘दीन’
गाँव.. माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य
सन् 1973 से कविता लेखन। कई कविता संग्रह प्रकाशित।
लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
वाट्सएप नंबर-9412055165
मेल आईडी-bhanubangwal@gmail.com
भानु बंगवाल, देहरादून, उत्तराखंड।
