पढ़िए दीनदयाल बन्दूणी की गढ़वाली कविता-प्यारू उत्तराखंड
प्यारू उत्तराखंड “
तेरा जिल्लौं से बड़ि छायू , प्यारू उत्तराखंड.
बीस साल ह्वीं राज्य बड़्यां , प्यारू उत्तराखंड..
करि आंदोलन मिलि सबुन , जै-कारा तेरु काय.
हत्ता-पल्ला कुछ ऐ नि मगर , प्यारू उत्तराखंड..
मिलिके सबन संघर्ष करि , कयून बीरगती पाय.
पैलि से आज बुरि दसम , प्यारू उत्तराखंड..
बीस साल का बीस पर्वाण , अपड़ा ज्यूकी काय.
हमकु जनि- तनि फलदु रै , प्यारू उत्तराखंड..
नौ नवम्बर आला-जाला, बीर सदनि याद राला.
शासन वल़ौं न बुजीं कंदूण , प्यारू उत्तराखंड..
हम दौड़ म पिछड़ी गिवां, कागज़ी दौड़ लगाइ.
हरिद्वार-देरादूण दौड़दु रायी , प्यारू उत्तराखंड..
कोरट-कचरी खूब लगीं, प्लोट-स्लोट खूब बिकीं.
रुप्या-पैंसौं की बरखा हूंणी , प्यारू उत्तराखंड..
शैरौं का सबि गूणि-बांदर, गौं-गौं ऐकी बसि गींन.
रात – दिना घंट्यांणु हुयूं च , प्यारू उत्तराखंड..
भाषा बात खूब हूंणी , बुद्धिजीब्यूं म होण लगीं.
वखा भाषा ह्वे देसि-न-पाड़ी , प्यारू उत्तराखंड..
‘दीन’ हमत प्रदेश ऐ गिवां, वख डुट्यल़ौंकू राज.
यख बैठी हम बोलदा रवां , प्यारू उत्तराखंड..
कवि का परिचय
नाम .. दीनदयाल बन्दूणी ‘दीन’
गाँव.. माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य
सन् 1973 से कविता लेखन। कई कविता संग्रह प्रकाशित।
लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
वाट्सएप नंबर-9412055165
मेल आईडी-bhanubangwal@gmail.com
भानु बंगवाल, देहरादून, उत्तराखंड।
