पढ़िए दीनदयाल बन्दूणी की गढ़वाली कविता-स्वाचा-स्वाचा, भलु-भलु स्वाचा
स्वाचा-स्वाचा, भलु-भलु स्वाचा,
भलु सोचिक, भलु – ज्यू ह्वे जांद.
बगत – बगत, सोची – सोची क –
बित्यूं बगत, कबि याद भि आंद..
इनु बी नीं, सब हमन द्याख- ल्याख,
आजा हुयूं बच्चा, आज तैं देखणूं च.
ये आज न सदनी, भोऴ ह्वे जांण –
आजा ये भोऴ तैं, वेन बि लेखणूं च..
चिंतन – मंथन, सदनि बटि ह्वाया,
सोचदै – सोचदै मनखि, बढदै ग्यायि.
जै ब्याऴि तैं, हम भलु-भलु बोलदवां –
वे ब्याऴी खातिर, कत्यूंन ज्यान गवांइ..
स्वाचा गौंम क्य छौं, सौ साल पैली,
चौछोड़ि , रिक्क- बाघ हि घुमदा छा.
मनखि जितदु छौ, कबि- कबि ऊंसे –
भिंडि दौं, रिक्क बाघ ही जितदा छा..
जैक दांव, जख – जखम लाग,
कुटमदर्यूं लेकि, उनै कू चलदै गाय.
हां एक बात छै, तब का लोगौं म –
बदन तोड़ि, तौंन मीनत काय..
नयॉं – नयाँ गौं, बसैं घाटी- पाड़ौं फरि,
कखि बटि वो भि त, आया- गाया छा.
इके मवसि करि, यख- वख बटि ऐकी
ओबि त तब, पलायन करि आया छा..
द्वी सौ चार सौ साला, इतिहास हमरु च,
जादा – जादा, आठ सौ साल ह्वे ह्वाला.
‘दीन’ ! यो इत्यास, अब हमन बचॉण –
मिलि- जुलि, जै- जै उत्तराखण्ड ब्वाला..
कवि का परिचय
नाम .. दीनदयाल बन्दूणी ‘दीन’
गाँव.. माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य
सन् 1973 से कविता लेखन। कई कविता संग्रह प्रकाशित।
Bhanu Bangwal
लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
मेल आईडी-bhanubangwal@gmail.com
भानु बंगवाल, देहरादून, उत्तराखंड।
