पढ़िए दीनदयाल बन्दूणी की गढ़वाली रचना- हमरु इत्यास
‘हमरु इत्यास.
डॉडी – कॉठ्यूं क हम , छवां रैवासी.
हम छवां गढवऴी भैजि, पाड़ा का वासी..
सीधी च बोलि हमरि , सीधी च चाल.
गढ़देश हमरू च , भारता कु भाल..
दुखम पल्यां छवां हम, दुखम रयां छवां.
दोसरौं कु दुख तैं हम , जड़दा छवां..
सुख क्याच , हमन कबि भी नि जांड़ी.
सदान जिंदगीम , दुख ही पच्छ्याड़ी..
रात – दिन यख रैंद , बस काम – धाम.
ज़रा बि नि मिलदू , चैन – अराम..
गोर – बखरा यख , जीवन अधार.
घास – लखड़ू कु यख , चलद ब्योपार..
कोदा – झुंगोरा कू , यख सादु खॉड़ू.
धोती- कुरता-पैजमा , टोपला कु लॉड़ूं..
सिर फरि सिरफूल अर , नाखा नथूली.
ब्यटलौं कि रैंद यख , गाळा हंसूऴी..
रौली- गदेर्युं कु यख , गुंजद संगीत.
एक – हैंकाम यख , उपजद प्रीत..
बाॅजा कि जाड़्यूं कु , ठंड – मिठु पॉड़ीं.
फर – फर हवा चलद , डाल्यूं हिल़ॉड़ी..
डाल्यूं म बैठि यख , घुघती घुरांद.
चखल्यूं चुचट यख , रात खुलांद..
देवी – देवतौं का दगड़ , शंखा टुंकार.
स्यू अर बाघा कि यख , सुड़िंद हुंकार..
कैलाश डॉडि यख , शिवजी कु वास.
ह्यूं पड़्यूं रैंद यख , द्याखा बारामास..
डौंरी – थकुलि अर , धूपा कि बास.
ढुंगा- डाऴौ पे लिख्यूं , यखाकु इत्यास..
डॉडी – कॉठ्यूं क हम , छवां रैवासी.
कवि का परिचय
नाम .. दीनदयाल बन्दूणी ‘दीन
गाँव.. माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य
सन् 1973 से कविता लेखन। कई कविता संग्रह प्रकाशित।
लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
वाट्सएप नंबर-9412055165
मेल आईडी-bhanubangwal@gmail.com
भानु बंगवाल, देहरादून, उत्तराखंड।
