कवि एवं साहित्यकार दीनदयाल बन्दूणी की गढ़वाली गजल-मिं पुरणु बग्त छुं

मिं पुरणु बग्त छुं

एक-हैंका नजरोंम, अबि बि-मिं अकरु छूं.
चंदी भौ-मुलौं कबि, अबत-फट्यूं चदरु छूं..

समै का दगड़ि, घटदि- बढदि गै मोल- भौ,
उनत- पुरणां बगता, काम अयूं- मंदुरु छूं..

जमना देखणा- मिं ह्वेग्यूं , निखालिस ढुंगु,
कबि मिन-नाज पीस, सुण-मिं वी जंदुरु छूं..

नौं-गौं बदलि, यखतक कि-दुधबोलि बदलि,
पर ! अक्ल-सक्ल से, अज्यूंबि-वी चंदरु छूं..

कतगै बि- बदलौ ऐ-गे होलु, हमम- तुमम,
अज्यूंबि- कोलण्यूं लुकि, छ्वीं- सुड़दरु छूं..

जगा जनु- भेष बदळणु, हरेका- सुभौ च,
मीं-गोळकखड़ि न सम्झ, अब मिं कुंदरु छूं..

‘दीन’ पुर्ण्यूंन-कनु नाज पांणि खै, गुजरु कै,
आज मीं-सब भूलिगीं, पर मिं- वी गंदरु छूं..

कवि का परिचय
नाम-दीनदयाल बन्दूणी ‘दीन’
गाँव-माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य-सन् 1973 से कविता लेखन। कई कविता संग्रह प्रकाशित।

Bhanu Prakash

लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
भानु बंगवाल
मेल आईडी-bhanubangwal@gmail.com
भानु बंगवाल, देहरादून, उत्तराखंड।