पढ़िए दीनदयाल बन्दूणी की गढ़वाली कविता-अधूरु जीवन
” अधूरु जीवन “
जीवन म सबि धांणी- गांणी , कब ह्वीं पूरी.
सच बोन ज्यूकि सोचीं बात, रै जांद अधूरी..
छोटौं से लेकी , बड़ा-बड़ौं तलक,
सब्यूंकि रैंद , कुछ – कुछ गांणि.
यूं तैं छट्यांण , पुर्याणा जुगत म –
जलम-भर कि रै , खैंचा – तॉड़ीं..
एक सोचि , तबरि हैंकी ऐ जांद,
क्वी बि बात , क्वी पुरे नि पांद.
जरा यख उधड़ी, जरा वख उधड़ी-
सरि उमर उधड़्यां , थेगऴे पांद..
जीवन बिति जांद , तनी – मनि झुरि- झूरी.
जीवन म सबि धांणी- गांणी , कब ह्वीं पूरी.
सच बोन ज्यूकि सोचीं बात , रै जांद अधूरी..
साधन-सम्पन्न , कनिबि हो क्वी,
ज्यूकी पूरि , कैन कब पुरे पायि.
एक अनार , बल सौ छन बिमार-
तबरि त हौरि- कुछ , हुर्रे ग्यायि..
जीवन , अफ से अफ तक नींच,
अपड़ौंम बटि , कै- ऐ जंदीं बीच.
बीच – बचौं का , घपरचाळ म –
ह्वे बिगर बाता , खींच -म- खीच..
तूड़ा- बूड़ी ह्वे , ह्वे बिगर बात की घूरा- धूरी.
जीवन म सबि धांणी-गांणी , कब ह्वीं पूरी.
सच बोन ज्यूकि सोचीं बात , रै जांद अधूरी..
कुछ अपड़ी , कुछ हौर्यूं माना,
जीवन का ये , सार पच्छ्यांणा.
खाली हाथ हि , आयी मनखी-
खाली हाथ हि, यख बटि जांणा..
इच्छा कारा , मन से पूरू कारा,
अगनै – पिछनै , चौछोड़ि ह्यारा.
कै नि सताॅणूं , कै नि दुखाॅणूं-
सब छन अपड़ा, सब छन प्यारा..
‘दीन’ इनम हि रै जंदीं , ज्यूकि स्वचीं अधूरी.
जीवन म सबि धांणी-गांणी , कब ह्वीं पूरी.
सच बोन ज्यूकि सोचीं बात , रै जांद अधूरी..
कवि का परिचय
नाम .. दीनदयाल बन्दूणी ‘दीन’
गाँव.. माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य
सन् 1973 से कविता लेखन। कई कविता संग्रह प्रकाशित।
लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
वाट्सएप नंबर-9412055165
मेल आईडी-bhanubangwal@gmail.com
भानु बंगवाल, देहरादून, उत्तराखंड।
