पढ़िए दीनदयाल बन्दूणी की गढ़वाली गजल- सदनि बटि इनीं

सदनि बटि इनीं

हमरि रै नौं धरैं , सदनि बटि इनीं.
तुमरि रै बीट तरै , सदनि बटि इनीं..

लोगौं धान बुसीं , सूण लोगौं बोल्यूं.
हमर चौंळ बुसीं , सदनि बटि इनीं..

कामा नौं फरि , जैर – मुण्डरु ह्वे जांद.
तुमरि करड़ि- बोऴड़ि रै , सदनि बटि इनीं.

काम काजा बगत , तनि छुयूंम नि छम्यावा.
तुम फरि ठसाग लगांड़ ह्वे , सदनि बटि इनीं..

समै बदली , नि बदलुदु समौं कबी.
जन समौं तन कल्यो बड़ , सदनि बटि इनीं..

हमन सोचु छौ , गौं मुलक रै कुछ करला.
तुमरि निकजु सोच रै , सदनि बटि इनीं..

अफ नि कारा , पर और्यूं जनैं त ह्यारा.
ये मुलका खोऱ फुट्यूं रा , सदनि बटि इनीं..

समै न दे अकल , ‘दीन’ तुम न बिगाड़ा शकल.
अपणु-अपणु खॉड़-कमॉड़ रै, सदनि बटि इनीं..

कवि का परिचय
नाम .. दीनदयाल बन्दूणी ‘दीन’
गाँव.. माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य
सन् 1973 से कविता लेखन। कई कविता संग्रह प्रकाशित।

Bhanu Prakash

लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
भानु बंगवाल
मेल आईडी-bhanubangwal@gmail.com
भानु बंगवाल, देहरादून, उत्तराखंड।