कवि एवं साहित्यकार दीनदयाल बन्दूणी ‘दीन’ की गढ़वाली गजल- अगोड़ि-पिछोड़ि

अगोड़ि-पिछोड़ि

इन्सान कु नाता-इन्सानियत से, अगोड़ि च.
हमरु स्वार्थ-हमरु दुखड़ा, सब पिछोड़ि च..

कबि- नि रैंदू एक जगा, यो- चंचल मन,
येका ज्यू भितर मचीं, झपोड़ा- झपोड़ि च..

क्वी-कैकि नि मनदू- सुड़दू, अपड़ि चलंदी,
बिगर बाता कि-यख हुईं, रगोड़ा-रगोड़ि च..

एक ब्वाद-इनु करण, हैंकु ब्वाद उनु-करण,
अपड़-अपड़ बांठा हुईं, निचोड़ा-निचोड़ि च..

इंसान की इंसानियत, सब पिछनै छुटिगे,
मतलब- बे- मतलबा, छपोड़ा -छपोड़ि च..

मन्खि की मासूमियत, नि रै मुखड़्यूं फरि,
अब त मुखों फरि हूंणी लपोड़ा- लपोड़ि च..

‘दीन’ प्यार-प्रेम का, भूखा इन्सान छां हम,
क्वी-जरा अगोड़ि च, क्वी-जरा पिछोड़ि च..

कवि का परिचय
नाम-दीनदयाल बन्दूणी ‘दीन’
गाँव-माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य-सन् 1973 से कविता लेखन। कई कविता संग्रह प्रकाशित।

Bhanu Bangwal

Website

लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
मेल आईडी-bhanubangwal@gmail.com
भानु बंगवाल, देहरादून, उत्तराखंड।