दीनदयाल बन्दूणी ‘दीन’ के गढ़वाली दोहे-पुरणि होऴि

पुरणि-होऴि

पैल्या होली- होरि छै, अब ह्वे ग्याई- हौरि.
हुलियारौं-आंण देखिक, सरैल जांदा-डौरि..

तब- हुलयारौ आंद छा, गौं- गौं द्वारौं- द्वार.
सजी-धजी हुलियारौं क, बीचम जिल्लादार..

फुलदेई बटि – पैटिगीं, ले देवी – आशीश.
सबि हुलियारा बीस छीं, कुई नी-यख उन्नीस..

माँ कु मंदिर बड़ांणा कु, गौं- गौं मगड़ां दान.
दान जुटै – मंदिर बड़ैं, बढाइ – देवी मान..

उनि होली-अब नि राई, अब रै-खाली याद.
चौकूम ऐ- खेलद छा, करदा छा – संवाद..

होली की हुड़दंग मा, मन म छाई- उलार.
फूलौं कू- रंग घोऴिक, मनांदा छा- त्युहार..

छरड़ी कु दिन-जब आई, माँ न तेकु चढाइ.
हमन भूड़ि – पकोड़ी खै, होरी खूब मनाइ..

‘दीन’ होली का-वो दिन, कन छा रौनकदार.
आजा हुड़दंग देखीक, नी निकऴिंदू भ्यार..

कवि का परिचय
नाम-दीनदयाल बन्दूणी ‘दीन’
गाँव-माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य-सन् 1973 से कविता लेखन। कई कविता संग्रह प्रकाशित।

Bhanu Prakash

लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
भानु बंगवाल
मेल आईडी-bhanubangwal@gmail.com
भानु बंगवाल, देहरादून, उत्तराखंड।