दीनदयाल बन्दूणी ‘दीन’ की गढ़वाली गजल-मिं गौड़ि छूं
मिं गौड़ि छूं
आज मेरी-कनि कुगति, मेरा गढवाऴ म हूंणीं च.
कै मुखन मींकु-माँ ब्वद्वा, मेरि जिकुड़ी रूणीं च..
जब तक – दींदू छौ दूध, हूंदि छै मींड- मलास,
ढांगु बड़िग्यूं – भैर करि द्यूं, आंखि मेरी चूणीं च..
मेरि खैरि-क्वी त सूंणा, कैक अगोड़ी मिन रूणा,
छऴकणा छी-आंसु मेरा, गंगा-जमुना ब्वगणीं च..
ज्वी देखद- अपड़ां धोरा, घंटे दींद – लठे दींद,
इनै – उनै दौड़ि – भजी, भारि असंद – आंणीं च.
भोऴ पूजा-पाठ करण, आसण भि केन लिपण,
गौंता गौंथ्यऴि द्यो-द्यवतौं, कख बटि क दींणीं च..
मां कु दूध कम पड़ी जो, मेरा दूधन बाऴा सैतीं,
पौडर छोऴि- बच्चों पिल़ाण, नै बात- सूणीं च..
‘दीन’ ! हे कनैया – गायौं चरैय्या, कख छै तू,
इनि कुतथा देखि गौण्यूं, त्वे दया नि औड़ीं च..
कवि का परिचय
नाम-दीनदयाल बन्दूणी ‘दीन’
गाँव-माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य-सन् 1973 से कविता लेखन। कई कविता संग्रह प्रकाशित।
Bhanu Bangwal
लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
वाट्सएप नंबर-9412055165
मेल आईडी-bhanubangwal@gmail.com
भानु बंगवाल, देहरादून, उत्तराखंड।
पहाड़ी में गायौं की हो रही दुर्गति पर लिखी रचना कैसी लगी बताना.