दीनदयाल बन्दूणी ‘दीन’की गढ़वाली कविता-स्वाचा

स्वाचा

दुन्यां का रंगा- दंगौं म, रंगमत न ह्वावा.
अपड़ा ऐथर – पैथर भि, द्यखद रावा..

तुमी छा- जौंन यो , आज बणांई.
अपड़ हथौंन, अपणु भाऽग रचाई.
तुमी अब बोना छा, यो क्य ह्वै गे-
स्वाचा- तुमन यो, क्य कैरि द्याई..

जन जगा रैला, उनी संगत पैला.
जन बोलि-बोली, उनीत सिखैला.
जनु देश-उनु भेष, अफी ह्वे जांद-
स्वाचा इनम संस्कार, कनम देला..

बगदि हवा दगड़, न बगद- उड़द जावा.
दुन्यां का…….

नौना- बिदकणा , ऊं समाऴा.
नौना- डबकणा, भलिखे पाऴा.
जनु आज च, भोऴ उनी बड़लु-
समझ से-समझ का, द्वार ख्वाला..

बगत लौटी, अज्यूं आंण लैगे.
नयूं सबक, रोज सिखांण लैगे.
बगत की- मार की , पैनि धार-
अपड़ौथैं अज्यूं, खुज्यांण लैगे..

बगत फरि बगत का, ध्वारा जावा-आवा.
दुन्यां का………

समै की चाल, भलिखे जांणा.
अपड़ौं भि, दगड़म पछ्याणा.
को छूट पैथर, अगनै कु गाई-
रावा सब्यूं, रऴाणा-मिऴांणा..

एक से एक मिल, ह्वे अग्यारा.
जमना-भीड़ म, न रावा न्यारा.
दूर बटि, पछ्याण ल्यो तुम थैं-
समड़ि च जो, वी त छिं म्यारा..

‘दीन’ ! बड़ैं-अपड़ी पैचान, सबथैं बतावा.
दुन्यां का…………

कवि का परिचय
नाम-दीनदयाल बन्दूणी ‘दीन’
गाँव-माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य-सन् 1973 से कविता लेखन। कई कविता संग्रह प्रकाशित।

Bhanu Prakash

लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
भानु बंगवाल
मेल आईडी-bhanubangwal@gmail.com
भानु बंगवाल, देहरादून, उत्तराखंड।