कवि एवं साहित्यकार दीनदयाल बन्दूणी की गढ़वाली गजल-ठंडु-मिठु
ठंडु-मिठु
बतौ- इनि बि, क्यांकि उठा-पोड़ ह्वे जांद.
बात- पीछा, क्यांकि दौड़ा- दोड़ ह्वे जांद..
सै- पे- कि क्वी काम, ठंडु- मिठल़ ही हूंद,
त्वे फरि पैंसौं कि, क्य ज्वड़ा-जोड़ ह्वे जांद..
रात- दिन कि खैंचा- खैंच , भलि नि हूंदी,
भिंडि खैंचा- तड़िम, झरक- तोड़ ह्वे जांद..
सैज से कर्यूं काम, सदनि फळद- फुलद,
दुन्या नजरौंम, इनु काम बे-जोड़ ह्वे जांद..
ज्यूका माफिक बड़्यूं खांणु, भूक बढांद,
बकि त-पेट भ्वरै, सपोड़ा-सपोड़ ह्वे जांद..
सोच्यां- तोल्या बगैर, कुछ बि बोलि दींणूं,
अफखुड़ी मुंडरु, घरचोड़ा-घरचोड़ ह्वे जांद..
‘दीन’ दरविरा खपद कखि बि, घैर चा बूंण,
भिंडि खयूं अपच, फिरोड़ा-फिरोड़ ह्वे जांद..
कवि का परिचय
नाम-दीनदयाल बन्दूणी ‘दीन’
गाँव-माला भैंसोड़ा, पट्टी सावली, जोगीमढ़ी, पौड़ी गढ़वाल।
वर्तमान निवास-शशिगार्डन, मयूर बिहार, दिल्ली।
दिल्ली सरकार की नौकरी से वर्ष 2016 में हुए सेवानिवृत।
साहित्य-सन् 1973 से कविता लेखन। कई कविता संग्रह प्रकाशित।
लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
वाट्सएप नंबर-9412055165
मेल आईडी-bhanubangwal@gmail.com
भानु बंगवाल, देहरादून, उत्तराखंड।
