कवि हेमवती नंदन भट्ट की गढ़वाली कविता-कोल्ड्रिक बियरबार पाड़ डांडा वार पार
कोल्ड्रिक बियरबार पाड़ डांडा वार पार
कच्ची न पक्क्यूंकि बार मैनिफैक्चिरिंग बहार
होली मेरा उत्तराखंडमां डेब्लपमेंट 2020 मा।
चूनै र्वट्टि झंगोरु कोदू कंडालि भूलिजा
केक ब्रेड टोस्ट मक्खन जैम रटिल्या
औणवलि च बहार हां, डेब्लपमेंट 2020 मा ।
ओल्ड बिचार फुंड धरा नयि थिंक अपणैल्या
नौना बालौं ना डरा रात बिर्त घुमणद्या
नाईट क्लब डिस्को बार मा, डेवलपमेंट 2020 मा।
काका काकी भूलिजा अंकल आंटी बोला बच्या
मांजी पिताजी नि ब्वन्न बोला मौम डैड क्या
जमानू मॉडर्न अैगि हां, डेब्लपमेंट 2020 मा।
पुरणि कुड़्यूं छट्ट छोड़ा लिपण घिसण ड्रौप करा
वबरि मंजुलि भूलिजा अपार्टमेंट म्वलैल्या
मेरा पाड़ै रोड़ सैड़ मा डेब्लपमेंट 2020 मा ।
यूपी की छुयूं न ला आंचल उतार्यालि हां
लखनौऊ बिसरिजा देरादूण का ह्वैजा
नया राजै राजधानी मा डेब्लपमेंट 2020 मा।
पैलि लुटदा छा भैर अब लुटेल्या भितर
भैरवला चोर छा भितरवला अपड़ा छन
काका बड्डा भाई भतिजा डेब्लपमेंट 2020 मा।
एैगि नई सरकार ब्वन्नी यनु बणौला पाड़
आंचल उतारि पैलि अब बणौला स्वीटजरलैंड
जु रयूंसयूं तै बि लुटौंला डेब्लपमेंट 2020 मा।
कवि का परिचय
हेमवती नंदन भट्ट हेमू
शिक्षा-परास्नातक समाजशास्त्र, इतिहास, राजनीतिशास्त्र, पीजी डिप्लोमा इन जर्नलिज्म एंड मास कम्यूनिकेशन।
वर्तमान संप्रति-मेडिकल सोशल सर्विस ऑफिसर/सहायक जनसंपर्क अधिकारी मीडिया एम्स, ऋषिकेश।
पता- अमर शहीद सूर्यग्राम 14 बीघा, मुनिकीरेती टिहरी गढ़वाल, उत्तराखंड।
Bhanu Bangwal
लोकसाक्ष्य पोर्टल पाठकों के सहयोग से चलाया जा रहा है। इसमें लेख, रचनाएं आमंत्रित हैं। शर्त है कि आपकी भेजी सामग्री पहले किसी सोशल मीडिया में न लगी हो। आप विज्ञापन व अन्य आर्थिक सहयोग भी कर सकते हैं।
मेल आईडी-bhanubangwal@gmail.com
भानु बंगवाल, देहरादून, उत्तराखंड।
